Villanueva sinala que hai varias "liñas de investigación abertas nos crimes de Ourense

O delegado de Goberno de Galicia, Santiago Villanueva, asegurou este luns que hai abertas "varias liñas de investigación" abertas sobre os crimes rexistrados en Ourense.

Villanueva aludiu así á morte de Socorro Pérez e do cura falecido en Vilanova dos Infantes sobre os que a Policía Nacional e a Garda Civil manteñen "todos os esforzos" para tratar de aclarar a autoría.

A Policía Xudicial "busca similitudes con outros feitos parecidos" ocorridos en Galicia e espera que "obteñamos resultados o máis pronto posible", sinalou.

"Tanto Garda Civil como Policía Nacional están a se envorcar con todos os seus esforzos e incluso intentando relacionarse con outras investigacións que hai ao longo do territorio nacional", declarou Villanueva, quen confiou en que as investigacións culminen "co esclarecemento dos feitos e a posta dos autores en mans da Xustiza".

No caso de Celanova, sinalou que os investigadores manteñen unha "relación moi intensa" coas forzas de seguridade de Portugal, xa que "un dos primeiros datos que tiñamos era a posible fuxida a Portugal".

"É unha das liñas nas que se está traballando", apuntou o delegado de Goberno, quen descartou dar máis datos para non pór "en perigo" sendas investigacións.

O párroco de Vilanova, Adolfo Enríquez, morreu a consecuencia dos golpes recibidos na cabeza durante o asalto á casa reitoral de Vilanova na noite do 9 ao 10 de marzo.

A Garda Civil continúa coas súas pescudas, aínda que seis meses despois non transcendeu a existencia de pistas que poidan levar aos autores.

Pola súa banda, a Policía Nacional trata de esclarecer o ocorrido na morte de Socorro Pérez, cuxo cadáver apareceu un mes logo da súa desaparición no monte do Alto do Seminario con signos de violencia.