Unhas duascentas persoas participaron na tarde deste luns nun acto de homenaxe a Abdelkhalek o Bouabi Hailas e Ezzoura Bouadel, o matrimonio marroquí que faleceu na explosión dun almacén clandestino de material pirotécnico en Paramos o pasado 23 de maio. O acto celebrouse no parque do Souto e comezou cun minuto de silencio, tras o cal o alcalde de Tui, Carlos Vázquez Padín, expresou o sentimento de pesar e de solidariedade coas vítimas mortais e cos seus dous fillos, de trece e oito anos.
O matrimonio foi enterrado o domingo pasado en Marrocos.
O rexedor recalcou que o Concello de Tui está pendente da situación dos dous menores, que nestes momentos están baixo a tutela da Xunta. Comprometeuse tamén a facer "todo o posible" por axudar aos veciños de Paramos e que a parroquia poida volver á normalidade canto antes.
En nome da comunidade marroquí, Noureddine Eljabraovi agradeceu a solidariedade que recibiu dos veciños de Tui e o apoio institucional.