A fase de vacinación contra a covid-19 das persoas maiores de 80 anos arrincou en Galicia este venres 19 de febreiro con unha proba piloto que acolle a área de Santiago-Barbanza e que servirá de ensaio para o inicio do groso do proceso, previsto para o luns 22 de febreiro.
Deste xeito, un grupo de 569 persoas están citadas este venres para acudir a oito puntos de vacinación situados na área sanitaria de Santiago onde recibirán a primeira dose.
Será unha proba piloto antes de que o vindeiro luns empece a vacinación da poboación maior de 80 anos en Galicia, que se desenvolverá, no caso do distrito santiagués, en 16 puntos diferentes para chegar aos máis de 34.000 octoxenarios da área de Santiago-Barbanza que restan por vacinar. Está previsto que 5.500 sexan vacinados na primeira semana.