A Consellería de Educación e as universidades galegas acordaron incorporar catro novos títulos de grao ao mapa de carreiras da comunidade, segundo informou o departamento autonómico nun comunicado. A decisión foi acordada por Xunta e institucións académicas nunha reunión.
Froito deste acordo, a Universidade da Coruña incorporará a titulación en Nanociencia e Nanotecnoloxía para o curso 2020-21, a de Vigo estreará o grao dual en Tecnoloxía da Automoción en 2021 e nese mesmo ano a USC sumará o grao en Innovación Gastronómica e Xestión Hostaleira, tras a conversión do CSHG en centro adscrito.
A maiores, daquela entrará en funcionamento un cuarto grao, o de Relacións Internacionais, que será o segundo interuniversitario do sistema galego, entre a UDC —no campus de Ferrol— e a UVigo, no de Ourense.