A Xunta e Cruz Vermella puxeron en marcha unha unidade móbil, na que dous profesionais asesorarán a persoas refuxiadas de Ucraína en diferentes poboacións galegas durante tres meses.
A conselleira de Política Social, Fabiola García, e a presidenta de Cruz Vermella en Galicia, Carmen Colmeiro, presentaron esta oficina na mañá deste mércores nun acto celebrado na Coruña.
A unidade estará na cidade herculina, concretamente en Monelos, ata este venres, para desprazarse logo a Santiago, Vigo e Ourense, ata completar o percorrido polas sete grandes cidades galegas.
Posteriormente, a oficina trasladarase a outras poboacións con gran afluencia de refuxiados ucraínos: Vilalba, Vilagarcía de Arousa e Monforte de Lemos.
Fará unha segunda volta naqueles lugares nos que haxa máis demanda.
Carmen Colmeiro explicou que serán unha traballadora social e unha intérprete as que informarán á poboación ucraína sobre as axudas que teñen dispoñibles e os trámites que deben realizar.
Pola súa banda, Fabiola García subliñou que o obxectivo desta acción é claro: "dar información ás persoas refuxiadas e acollelas na nosa comunidade autónoma".
Así, detallou que se ofrecerá asesoramento no ámbito sanitario para que saiban como acceder á dispensación de vacinas, ao cartón sanitario e a outros servizos.
Ademais, poderán informarse sobre o ámbito educativo e a formación prelaboral, pois se pretende que aprendan canto antes o idioma para que poidan incorporarse ao mercado laboral.
Polo momento, son uns 1.400 ucraínos os que conseguiron a protección temporal en Galicia e poden optar a estes servizos.