Xinzo di non ao 'feldespato' cunha tractorada

Os veciños de Xinzo de Limia mostraron hoxe o seu rexeitamento ao proxecto da mina de feldespato no seu municipio cunha tractorada.

Uns 80 vehículos agrícolas, precedidos de decenas de veciños a pé encabezados por unha pancarta na que se lía ''a mina ou nós'', percorreron varias rúas da vila, para dirixirse finalmente á parroquia de San Pedro de Laroá, onde simbolizaron cos tractores a barreira e a oposición á minería.

"Esa barreira é a que se van a atopar cando veñan", afirmou a EFE a presidenta da asociación de veciños Corno do Monte, convocante da manifestación, María del Carmen Díaz.

Antes de que arrincase a tractorada, a presidenta da asociación leu un manifesto no que recordou que levan xa "case medio ano dicindo na rúa, no Concello, na Xunta de Galicia e ata en Bruxelas que non queremos a mina".

"Hoxe defendémolo coas nosas ferramentas de traballo", abundou e preguntouse: "¿Como imos estar tranquilos se esta mesma semana chegounos unha carta da Consellería de Industria na que dicían que o proxecto segue o seu curso?" e que se terán "en conta os informes".

Sobre as posturas das secretarías xerais de Ordenación do Territorio e Urbanismo e de Medio Rural e Montes, recordou que a primeira emitiu un informe favorable, mentres que a segunda fíxoo desfavorablemente, ao ter en conta a súa interferencia no desenvolvemento agrario da zona.

Comentarios