O Xulgado de Primeira Instancia e Instrución número 3 de Santiago citou para o vindeiro mércores 26 de abril a declarar como testemuñas a Santiago Tomé, un dos membros da subcomisión da hepatite C e á que era directora de Recursos Económicos do Chus, María José L.R., e ao seu homólogo no Chuac, Emilio C.F.
Segundo confirmaron a Efe, estas declaracións como testemuñas derivan das anteriores declaracións dos dous altos cargos do Sergas, o que fora director xeneral de Asitencia Sanitaria do Servizo Galego de Saúde (Sergas) –e actual xerente da área sanitaria de Vigo–, Félix Rubial, e subdirectora xeral de Farmacia, Carolina González-Criado, investigados por supostos delitos de prevaricación e homicidio imprudente, nunhas declaracións nas que derivaron as decisións na subcomisión da hepatite C.
Por iso, tal e como apuntaron a Efe as fontes consultadas, proseguirá a toma de declaracións como testemuñas ao resto dos membros da citada comisión, para o que, con todo, aínda non hai data fixada.
Xa se produciron os contactos coas familias das seis vítimas
Doutra banda, o presidente da Plataforma Galega de Afectados pola Hepatite C, Quique Costas, confiou en que os testemuños da próxima semana sirvan para "saber como se facían as cousas e quen tomaba as decisións" en tanto que os tres están citados como testemuñas, e polo tanto teñen a "obrigación" de dicir a verdade.
Ademais, tal e como ditara o maxistrado que se ocupa desta investigación producíronse contactos coas familias das seis vítimas ás que obedece a investigación por homicidio imprudente, para informarlles de que teñen á súa disposición as accións legais que consideren oportunas.
Estes contactos xa están en marcha e xa se produciron con cinco das seis familias afectadas.