Membros da asociación ecoloxista Outeiro, do Carballiño, informaron do achado de petróglifos de fai 5.000 anos en montes da zona onde está prevista a construción da incineradora de residuos do sur de Galicia, no municipio ourensán do Irixo.
A asociación informou nun comunicado de que os petróglifos se atopan nos montes comunais do Irixo, Orosa, Cardedo, Menaz, Filgueira e Casares, polo que solicitou a paralización do proxecto, non só polo "gran valor arqueolóxico" da zona, senón tamén porque defenden outros modelos máis efectivos para tratar os residuos.
Segundo explica o arqueólogo Antonio de la Peña no escrito, os petróglifos achados, nos que se poden apreciar "figuras, círculos concéntricos e cazoletas", representan "unha das manifestacións culturais máis importantes da prehistoria europea", que podería datarse, segundo as primeiras hipóteses, no terceiro milenio antes de Cristo.
Ante este achado, a asociación Outeiro presentou unha solicitude ante a delegación provincial de Cultura para pedir a "catalogación urxente" e a toma de medidas de protección dos petróglifos, xunto " creación dun parque arqueolóxico".
Engade que non é o primeiro achado deste tipo, nos montes comunais do Irixo e recorda que no ano 2005 tivo lugar "o maior achado dos últimos anos no que a arqueoloxía se refire", con máis de vinte rocas con todo tipo de simboloxía e tumbas neolíticas.