Un centenar de estudantes boicoteou onte pola tarde un acto do presidente da Xunta, Alberto Núñez Feijóo, que debía inaugurar a XV Conferencia de Decanos e Directores de Matemáticas que se celebra en Compostela.
O grupo que impulsou esta acción alegou que era "en protesta contra os recortes que o Goberno e o Executivo galego realizan en materia de educación".
O grupo de universitarios, baixo argumentos como "aquí non hai presidente" ou "deixade de facer propaganda", tomou a entrada da Facultade de Matemáticas da Universidade de Santiago Compostela (USC), situada no Campus Sur, segundo informaron a Efe fontes próximas á institución académica.
A pesar de que o reitor da USC, Juan Viaño, presente no evento, intentou mediar para conseguir que Núñez Feijóo entrase á conferencia, o grupo de estudantes non cedeu na súa protesta, que coincide co último día da folga convocada polo Sindicato de Estudantes.
Finalmente, tras a marcha voluntaria do máximo mandatario galego, o acto desenvolveuse con total normalidade.
Este é un dos chíos de celebración que puideron lerse logo do ocorrido.
[#Compostela] Unha nova vitoria para o estudantado da USC. #Feijóo fóra da universidade! #GanarLaUniversidad pic.twitter.com/YGw4qzoWkT
— Xuventude Comunista (@XCGaliza) October 23, 2014 
