O pleno de Tui aprobou por unanimidade solicitar a declaración de zona gravemente afectada por un sinistro de protección civil para a parroquia de Paramos, onde explotou un almacén ilegal de material pirotécnico que matou a dúas persoas e feriu a outras 37, e causou estragos en decenas de casas.
Na sesión plenaria, que comezou cun minuto de silencio polas vítimas, estiveron presentes varios veciños que perderon as súas vivendas por mor da explosión.
Os grupos acordaron e apoiaron unha moción de urxencia na que ademais de solicitar aos ministerios de Hacienda e Interior que leven ao consello de ministros devandita declaración, inclúe a personación da corporación local como acusación particular no proceso penal aberto contra o dono da pirotecnia La Gallega.
Así mesmo, coincidiron en solicitar axuda á UE, ao Goberno central, a Xunta e a Deputación de Pontevedra, ao exceder as consecuencias da traxedia as posibilidades económicas da administración local.
Neste sentido, o pleno de Tui tamén deu luz verde á habilitación dunha partida de millón de euros, ampliable, con cargo ao remanente de tesourería para o fondo de urxencia para os damnificados pola explosión en Paramos.
Así mesmo, aprobou inicialmente o proxecto de orzamentos municipais de 2018 tras desfacer o voto de calidade do rexedor o empate entre os grupos que sosteñen o goberno e os da oposición e a abstención dun concelleiro non adscrito.
