A Sala do Civil e o Penal do TSXG ditou unha sentenza na que revoga o dereito dunha muller a recibir a herdanza do seu marido falecido porque se atopaban separados no momento da morte. Con iso, o órgano xudicial considera que os legados en favor dos cónxuxes son ineficaces cando no momento de falecer estean separados ou divorciados, legalmente ou de feito.
O fallo, cuxo relator é o maxistrado Pablo A. Sande García, responde o caso concreto dun home que nomeou herdeira en 2010 a súa entón esposa, de quen posteriormente se separou, aínda que non modificou de facto as súas últimas vontades.
No testamento, segundo o TSXG, o marido "revelou a razón pola que a nomeaba como a súa herdeira", "sen que nada faga concluír que, de non ser a súa esposa, a tivese instituído herdeira universal". Así, os maxistrados destacan que, unha vez que os cónxuxes se separaron de feito, en 2012, esa disposición testamentaria "quedou privada de causa ou motivo". Ademais, engaden, no momento da apertura da sucesión do testador, cando faleceu, en 2015, "persistía a separación, sen que sexa acreditada reconciliación algunha entre ambos".
O TSXG precisa na sentenza que, salvo que se especifique no testamento que aínda nos supostos de ruptura ou crise matrimonial o cónxuxe é o herdeiro, esta disposición quedará sen efecto neses casos.
A sala subliña que a ineficacia "non esixe nin require declaración algunha de vontade do testador que a complete ou ratifique ao tempo do seu falecemento" e conclúe que o lexislador galego parte do entendemento de que as disposicións testamentarias a favor do cónxuxe se efectúan "na súa condición de tal e sempre que o sexa", de maneira que "quedarán sen efecto" se, ao falecer, os cónxuxes se atopasen, entre outros supostos, divorciados ou separados, legalmente ou de feito.
