Os axentes de Tráfico puxeron 344 multas diarias o ano pasado na rede de estradas da provincia de Lugo, que foi o territorio galego onde máis se dispararon as sancións ao volante en 2022 con moita diferenza. Foron un total de 125.578 multas, un 8,47% máis que en 2021 (115.775) que supón duplicar o incremento de Pontevedra (3,64%); por non falar da Coruña, onde se mantiveron estables, ou de Ourense, onde descenderon. Así, o aumento das infraccións ao volante de Lugo multiplica con fartura a subida media galega, que en 2022 foi do 1,3%.
En canto á tipoloxía das sancións, máis ou menos coinciden en toda Galicia. No caso de Lugo, as de exceso de velocidade levan a palma, xa que foron 53.705 por radar fixo e 53.086 por cinemómetros móbiles, sendo estas as que máis subiron (17%).
Séguenlle en importancia carecer da ITV ao día, con 5.219 sancións; e inmediatamente despois aparece o alcol, con 2.375. O caso dos condutores ebrios merece un capítulo aparte en toda a comunidade, xa que as denuncias incrementáronse cassi un 43% respecto ao ano anterior -algo menos en Lugo, un 38%-, segundo recolle o estudo "Radiografía das multas de Tráfico en España 2022" elaborado por Automobilistas Europeos Asociados (AEA) coa estatística da DXT.
Foron 14.676 multas por strong<> alcol en toda Galicia, cifra á que se suma case outro centenar por negativas a someterse á proba.
Fose do alcol, e seguindo o ranking de frecuencia, na provincia de Lugo aparecen as denuncias por non identificar ao condutor (1.811), por non levar cinto (1.332) -aínda que estas con tendencia á baixa- e as de conducir sen carné ou con el retirado (1.151), que se incrementaron.
Dous datos significativos na provincia extraídos do informe teñen que ver coas drogas e cos seguros. No primeiro caso, porque os condutores con test positivo baixaron máis do 50% ata quedar en apenas 356; todo o contrario que os que circulan sen seguro, que se dispararon un 31% ata os 830.
Datos de Galicia e España
En total, a Dirección Xeral de Tráfico (DXT) formulou en Galicia o ano pasado 516.035 denuncias a condutores, un 1,32% máis. En todo caso e a pesar de ser un dos territorios onde creceron as sancións, ese incremento foi moi inferior ao de Andalucía (42,8%), Estremadura (32,3%), Cantabria (26,3%), A Rioxa (24,7%), Madrid (21,2%), Illas Baleares (18,1%), Comunidade Valenciana (18%) ou Castela-A Mancha (9,2,%). Por contra, descenderon en Navarra (-8%), Castela e León (-2,9%), Murcia (-2,1%), Aragón (-1,5) e Asturias (-0,4%).
En liñas xerais, en España dúas de cada tres denuncias son por exceso de velocidade, aínda que aumentan as de radares móbiles e baixan as de fixos. En canto ao uso do teléfono móbil, curiosamente descendeu o exercicio pasado.
O ano 2022 foi no país o de marca de recadación da DXT en multas, con 507.361.888 euros, por encima dos 444.347.375 do ano anterior.
