O período hábil xeneral para poder exercer a actividade cinexética en Galicia comezará o 16 de outubro e estenderase ata 6 de xaneiro do próximo ano, durante o que se poderá cazar os xoves, domingos e festivos tanto de carácter estatal como autonómico.
Así se recolle na resolución da Consellería de Medio Ambiente, Territorio e Vivenda publicada este martes e pola que se determinan as épocas de caza, as medidas de control por danos e os réximes especiais por especies durante a tempada 2022-2023.
Neste sentido e como consecuencia directa da inclusión do lobo na Listaxe de especies silvestres en réxime de protección especial (Lesrpe), a Xunta sinala que tivo que excluír da resolución anual de caza, por primeira vez, a posibilidade de realizar controis poboacionais polos danos que poidan ocasionar estes animais.
Esta é unha das novidades principais da tempada 2022-2023, que se deriva da decisión do Goberno central –subliña a Xunta– de elevar a protección do lobo ibérico ao norte do río Douro a través da orde ministerial publicada o pasado 21 de setembro, unha medida á que se opuxo o Executivo autonómico "por carecer de fundamento científico e porque, ademais, deixa aos gandeiros e a xente que vive no rural nunha situación moi delicada".
De feito, desde a inclusión do lobo no Lesrpe, as comunidades loberas como Galicia xa non poden adoptar, con carácter xeral, determinadas medidas de control e xestión sobre esta especie nos seus respectivos territorios, xa que os requisitos e condicións esixidos na propia orde para que poidan autorizalas fan que, na práctica, afirma a Xunta, "sexa un procedemento inaplicable".
Adestramento de cans en calquera época do ano
Outra das novidades da resolución anual de caza é que se reflicte expresamente que nos tecores e con fins de competición, poderá autorizarse o adestramento de cans e aves de cetrería en calquera época do ano dentro das zonas que teñan aprobadas con este fin.
Así mesmo, incorpórase un novo artigo para establecer que as xornadas hábiles de caza –unha actividade que só se pode practicar no período comprendido entre unha hora antes da saída do sol e unha hora despois do atardecer– virán determinadas polas horas oficiais que se publiquen na páxina web de Meteogalicia.
Caza menor
En canto á regulación da tempada para as distintas especies, dentro da caza menor, no caso da arcea e agachadiza, o período xeral irá tamén de 16 de outubro a 6 de xaneiro de 2023 –aínda que poderá ampliarse ata o 12 de febreiro en terreos de réxime cinexético especial (RCE) que o soliciten– os xoves, domingos e festivos.
Para a lebre, a actividade cinexética estenderase de 16 de outubro a 27 de novembro deste ano, os xoves, domingos e festivos en terreos de RCE.
Corzo e xabaril
No relativo á caza maior, os machos adultos de corzo poderán capturarse en terreos en réxime cinexético común entre o 20 de agosto e o 15 de outubro, os sábados en batida-montería, e todos os días da semana na modalidade de axexo.
As femias adultas de corzo permanecen vedadas con carácter xeral, permitíndose o seu caza puntual por danos e tamén nos tecores se está tecnicamente xustificada de acordo coa situación real da poboación en cada tecor, podendo escollerse entre dous períodos (do 3 de setembro de 2022 ao 15 de outubro; ou do 7 de xaneiro ao 18 de febreiro de 2023).
Polo que respecta ao xabaril, no réxime cinexético común o período xeral de caza abarcará do 20 a 31 de agosto e de 7 de xaneiro a 26 de febreiro de 2023, os xoves, sábados, domingos e festivos; e de 1 de setembro de 2022 a 5 de xaneiro do próximo ano os sábados, na modalidade de batida, montería e espera.
Así mesmo, no réxime cinexético especial, a tempada irá de 20 de agosto a 26 de febreiro de 2023, os xoves, sábados, domingos e festivos nas modalidades de batida, montería e espera.
