martes. 27.07.2021 |
El tiempo
martes. 27.07.2021
El tiempo

Tellado advirte do "risco" dun "multipartito" liderado polo BNG

Rueda de prensa del secretario xeral del PPdeG, Miguel Tellado. PEPE FERRÍN
Rueda de prensa del secretario xeral del PPdeG, Miguel Tellado. PEPE FERRÍN

O número 2 do PPdeG non descarta que o Goberno de Feijóo leve aos tribunais ao Estado polo IVE antes das eleccións autonómicas 

O secretario xeral do PPdeG, Miguel Tellado, advertiu este domingo que nas eleccións autonómicas do próximo 5 de abril "está en xogo a estabilidade política" na comunidade e que o "risco de que o multipartito sexa liderado polo BNG" na Xunta "é real". 

Nunha entrevista concedida á Radio Galega, recollida por Europa Press, manifestou que o obxectivo do seu partido é que Galicia "siga sendo unha autonomía seria, rigorosa, moderada, solvente" e "que cumpra coas súas obrigacións". 

"Ese é o noso modelo, mentres que o alternativo é o do multipartito que quere fragmentar e dividir á sociedade e traer a Galicia problemas que hoxe non temos", subliñou, á vez que apelou a "apostar por un líder experimentado" como o actual presidente, Alberto Núñez Feijóo. 

Para Tellado, o tamén presidente do PPdeG é "recoñecido e reconocible" e preséntase "cun balance de xestión e cun proxecto que está máis vivo que nunca". "Un presidente libre, para o que Galicia está por encima da loita entre partidos", engadiu. 

En canto ás enquisas, dixo que se observa unha tendencia á alza do BNG e un "afundimento" do PSdeG, que se explica "canto maior é o coñecemento" do seu candidato, Gonzalo Caballero
Neste sentido, advertiu de que "é perigoso", porque o nacionalismo do Bloque "quere traer a Galicia a inestabilidade que xerou en Cataluña". "O risco de que o multipartito sexa liderado polo BNG é real", apuntou. 

Sobre a coalición entre Podemos, Esquerda Unida, Anova e as mareas municipalistas (baixo a marca Galicia en Común-Anova Mareas), o secretario xeral do PPdeG asegura que "é a mesma" alianza que asinaron en 2012 con Alternativa Galega de Esquerda (Age) e en 2016 con En Marea, cuxo grupo parlamentario se fragmentou definitivamente no verán de 2019. 

"Non podemos saber o que vai pasar, pero si o que pasaría. Se Alberto Núñez Feijóo non gañase, Villares –candidato de En Marea en 2016– sería presidente, cun grupo que abandonou o partido e cun Leiceaga --o candidato socialista-- que marchou a Madrid hai uns meses", explicou. 

Na entrevista coa Radio Galega, Tellado non descartou que a Xunta leve ao Goberno central ante os tribunais polos 200 millóns dunha mensualidade do Ive de 2017 antes das eleccións do 5 de abril. 

Tellado advirte do "risco" dun "multipartito" liderado polo BNG
comentarios