As traballadoras do servizo de limpeza dos colexios públicos de Ourense, acordaron, nunha reunión celebrada esta tarde, suspender a folga iniciada o pasado luns, tras aceptar o novo calendario de pagos proposto pola empresa para poder cobrar as nóminas.
En declaracións a Efe, o portavoz da CIG de Ourense, Anxo Pérez Carballo, informou que na asemblea 46 traballadoras votaron a favor da proposta que realizou onte á primeira hora da mañá Linorsa para frear a folga indefinida, cando se cumpren oito días de protestas.
Na proposta, a empresa establece o abono do "50% pendente" de pago, correspondente á nómina do mes de outubro "como moi tarde o día 1 de decembro" e o "50% do salario" correspondente ao mes de novembro dentro dos cinco primeiros días de decembro. Ademais, "a débeda contraída, é dicir, o 50% da nómina de novembro e o 70% da paga extraordinaria de Nadal, serían abonadas de forma rateada proporcionalmente xunto co pago das nóminas de xaneiro, febreiro e marzo de 2015".
O seguinte pago produciríase o 22 de decembro (un terzo da paga extraordinaria) e o 1 de xaneiro o persoal recibiría a nómina do mes de decembro.
Previamente a esta reunión, o alcalde de Ourense Agustín Fernández, instou hoxe á empresa a que "cumpra as súas obrigacións" e que os nenos reciban "a educación que se merecen" en condicións óptimas de saúde. Polo momento, o persoal decidiu suspender a folga á espera de que se cumpran os compromisos adquiridos por ambas as partes.