na rolda de prensa posterior á reunión da Comisión de Coordinación Cooperativa para facer fronte á urxencia do coronavirus, O presidente en funcións da Xunta, Alberto Núñez Feijóo, celebrou este sábado que quede decretado o estado de alarma por ser a "resposta única" que botaba en falta para atallar a pandemia do coronavirus, porque "ata esta data non houbo ningunha" outra obrigada para todos.
Núñez Feijóo anunciou o venres o peche de todos os establecementos públicos que non fosen de primeira necesidade pero o Goberno central ampliou a posibilidade de abrir a negocios como as barberías ou as lavanderías, algo que non acaba de comprender –en opinión de presidente galego, en Galicia algunhas destas liberdades comerciais non son "imprescindibles"–.
O máximo mandatario autonómico si anunciou na súa intervención que os supermercados terán en Galicia liberdade horaria, de maneira que poderán traballar día e noite para evitar aglomeracións; e tamén garantiu a apertura de todos "os albergues sociais, cociñas económicas e centros de inclusión".
"ESTAR UNIDOS". O titular da Xunta tamén deu a súa opinión sobre a resposta do Goberno español ante a crise do coronavirus. "Era mellor ter 17 respostas que non ter ningunha, porque lamentablemente ata esta data cada un tivo que dar a súa resposta ao non haber unha soa, pero agora que a temos, compartámola ou non, é unha resposta", apuntou.
En todo caso, e consultado sobre se o estado de alarma é "un 155 encuberto", o presidente galego sinalou na súa conferencia que "o representante ordinario do Estado na comunidade é o seu presidente" e este debe "entender que, cando un presidente do Goberno declara o estado de alarma, está a exercer unha función constitucional".
"É momento de estar unidos dentro e fóra do Goberno e reitero que o Goberno de España vai contar incondicionalmente con Galicia para todo o que dependa da Xunta", resolveu Núñez Feijóo, quen precisou que "se a resposta (do Goberno) chegou no tempo adecuado" é unha cuestión "que quedará para analizar posteriormente" en profundidade.
De momento, o titular do Executivo galego apuntou que "custa entender que as comunidades actúen con máis celeridade que o Goberno da nación" e engadiu que "o que non pode ser é que o Goberno non funcione como un só", polo que espera que "as diverxencias que houbo no Consello de Ministros non se volvan a producir".
"A xente o que quere é efectividade, non entende de Gobernos bipartitos nin de tensións dentro do Goberno", proseguiu Núñez Feijóo, quen tamén asegurou que "supón" que hai razóns para "cousas que non entende", como "anunciar algo o venres para aprobalo o sábado pola tarde e que entre en vigor o"domingo .
CRÍTICAS Ao GOBERNO. Preguntado por se comparte a posición do presidente do Partido Popular, Pablo Casado, durante a crise do coronavirus, o presidente galego respondeu que xa lle gustaría a calquera Goberno ter un xefe da oposición do nivel de Casado", tendo en conta que demostrou "un gran nivel de lealdade institucional".
"Non quero entrar noutras crises sanitarias que se produciron en España hai tempo e a resposta de determinadas persoas", proseguiu Núñez Feijóo, en clara referencia ás críticas recibidas polo Executivo central de Mariano Rajoy durante a crise do ébola.
O presidente da Xunta tamén asegurou, ante as consultas que lle foron formuladas, que os presidentes do País Vasco e Cataluña, Íñigo Urkullu e Quim Torra, respectivamente, non se puxeron en contacto con el para trasladarlle a súa desconformidade coa asunción de determinadas competencias autonómicas por parte do Goberno central durante o estado de alarma.
"Non tiven ningún contacto en todo o día co presidente de Euskadi nin da Generalitat", resolveu Núñez Feijóo, quen si falou con Urkullu o venres pola mañá para tratar "cuestións bilaterais".
Para rematar, ante as preguntas sobre un adiamento electoral, pediu que a suspensión das eleccións convocadas nun principio para o próximo 5 de abril leve a cabo nos "primeiros días da próxima semana" e, polo momento, non se mostrou partidario de marcar unha nova data.
