SANTIAGO. A Sociedade Galega do Medio Ambiente (Sogama) acaba de lanzar un manual en formato dixital para recordar a importancia de practicar no día a día o principio das tres erres —reducir, reutilizar e reciclar—. Con motivo da celebración, hoxe, do Día Internacional do Recicclaje, a sociedade que preside Javier Domínguez Liño súmase á mesma coa lema Recíclache con Sogama. Querer é poder! e lanza esta nova ferramenta online, á que se pode acceder a través da web www.sogama.gal
Nela, calquera cidadán pode consultar de forma moi sinxela e accesible información relacionada coa importancia de reducir a xeración de residuos, de protexer os recursos "escasos e limitados" do planeta e combater o cambio climático. E é que reciclar evita a extracción de materias primas e preserva os recursos naturais, diminúe a dependencia de combustibles fósiles e a emisión de gases de efecto invernadoiro e, ao mesmo tempo, crea emprego a través da economía verde e circular. Ao final, trátase de gañar vida para o planeta.
Ademais, Sogama recorda no seu manual online os materiais que deben e non deben depositarse en cada un dos colectores de recollida selectiva: amarelo para envases de plástico, latas e briks; azul para papel e cartón; iglú verde para envases de vidro, e colector verde convencional para a chamada fracción resto. E ao mesmo tempo explica o funcionamento e a filosofía das súas instalacións de Cerceda, recentemente ampliadas. "Sogama está convencida de que, sumando colaboración cidadá e innovación tecnolóxica, se falicitará o camiño cara á economía circular".
VISITA DE África. Precisamente, como o problema dos residuos non entende de fronteiras, unha delegación da República Democrática do Congo integrada por políticos e técnicos visitou Cerceda para coñecer de primeira man as instalacións e o funcionamento de Sogama, como porta cara á implantación desa economía circular. A elección do modelo galego obedece, recorda a sociedade pública, ao seu carácter integral, xa que aplica as tres erres e compleméntaas coa recuperación enerxética dos residuos non reciclables. O presidente de Sogama, Javier Domínguez Liño, e o director xeral, Isidro García Téllez, fixeron de anfitrións.
