A Sociedade Galega de Medio Ambiente (Sogama) licita por case catro millóns de euros a construción e posta en marcha dunha planta de compostaxe que procesará a fracción orgánica dos refugallos co obxectivo de fabricar compost e que terá unha capacidade de 15.000 toneladas anuais.
Esta planta situarase nas dependencias desta empresa de titularidade pública en Areosa, no municipio de Cerceda (A Coruña), segundo publica o Diario Oficial de Galicia.
Fontes da empresa que preside Javier Domínguez Lino detallaron que os equipos mecánicos desta instalación serán deseñados para que poidan tratar, polo menos, un 10% máis de refugallos, o que "permitirá absorber as variacións debidas á estacionalidade, os tempos de indispoñibilidade e outros condicionantes".
No caso dos materiais que non sirvan para compostar pero si para reciclar enviaranse á industria transformadora para convertelos en novos produtos.
O obxectivo de Sogama é un deseño que dea máxima fiabilidade e robustez ao proceso, que posibilite a recuperación de materiais con técnicas automáticas de clasificación, que permita obter produtos de alta calidade, que contribúa ao cumprimento dos obxectivos de valorización contemplados na Directiva de Residuos e reduza o impacto da actividade da planta no medioambiente.
O prazo para a presentación das ofertas finalizará o próximo 17 de marzo.
Sogama licita a construción dunha planta de compostaxe por case catro millóns de euros
Situarase nas dependencias que esta empresa pública presidida por Javier Domínguez Lino ten en Areosa, no municipio de Cerceda
