O Sergas prevé finalizar durante "a próxima semana" o proceso de administración da primeira dose da vacina de AstraZeneca contra o covid-19 aos profesores de ata 55 anos, dos que máis de 25.000 xa a recibiron, e o persoal non docente.
Así o trasladaron os conselleiros de Educación, Román Rodríguez, e Sanidade, Julio García Comesaña, no marco do Consello Escolar de Galicia, convocado para analizar as medidas adoptadas neste ámbito e abordar a planificación do que resta de curso desde unha perspectiva de normalización do proceso educativo.
Neste contexto, o titular de Sanidade explicou que se continúa avanzando na vacinación dos docentes", dos que máis de 25.000 xa recibiron a primeira dose. Tamén indicou que o proceso proseguirá co persoal non docente coa previsión de que finalice "a próxima semana".
Pola súa banda, Rodríguez analizou cos membros do Consello Escolar de Galicia a liña de actuación no ámbito educativo de cara ás fases de avance "e normalización", que estarán marcadas polo proceso de vacinación iniciado a semana pasada. Ademais, destacou o "compromiso e o traballo" mostrados polo sistema público de saúde cara ao ensino durante este curso e recordou que ao comezo do mesmo marcáronse como obxectivos prioritarios "alcanzar a máxima seguridade nas aulas" e que a pandemia "non derivase nunha crise educativa". Por iso, fixo
Así mesmo, recordou as iniciativas postas en marcha para facilitar o desenvolvemento do proceso educativo a pesar da situación sanitaria e detallou que se basearon no apoio de recursos humanos e loxísticos, a organización académica co deseño do Plan de Ensino Virtual e a habilitación de mecanismos de atención a distancia.
De cara aos próximos meses, o conselleiro de Educación identificou a celebración das probas da Abau e a convocatoria de oposicións, que congregarán a 26.000 aspirantes e terán lugar entre xuño e xullo, como os retos que deberán afrontarse. Así, chamou a seguir "esforzándose" e a non "baixar a garda" para superar con éxito este curso escolar.
