Servizos públicos como sanidade e a educación, a crise industrial de Galicia, a recuperación poscovid e a chegada dos fondos europeos Next Generation marcarán a próxima semana o primeiro Debate do estado da Autonomía da XI lexislatura.
A xunta de portavoces da Cámara, reunida este martes, fixou para os próximos mércores 13 e venres 15 de outubro esta cita para a que todos os grupos -PPDEG, BNG e PSDEG- fixeron este martes unha chamada ao "consenso".
O hemiciclo arrincará ás 10.00 da mañá do mércores 13 coa intervención, sen límite de tempo, do presidente da Xunta, Alberto Núñez Feijóo.
Xa de tarde, sobre as 16.00 horas, intervirán os portavoces de cada un dos grupos, que terán un tempo aproximado de 45 minutos, tras o cal Feijóo poderalles responder. Os partidos terán unha segunda intervención de 15 minutos antes do peche da xornada por parte do presidente da Xunta.
O xoves 14 estará reservado para as negociacións das propostas de resolución, que serán votadas o venres 15 tras novas intervencións dos grupos para fixar as súas propostas.
