O conselleiro de Sanidade, Xullo García Comesaña, admitiu este luns que o "número importante" de contratacións nos servizos de Enfermería do Sergas, en comparación co persoal doutros anos, "fai máis difícil" as substitucións no verán, aínda que apuntou que as áreas están a traballar para que se poida "compatibilizar" do dereito ao descanso do persoal coa actividade asistencial.
A preguntas dos medios tras participar nun acto en Vigo, García Comesaña explicou que o persoal de Enfermería ten "un peso importantísimo" no conxunto de traballadores do Sergas, polo que "hai que abordar do mellor xeito posible" a súa substitución en período estival.
Segundo indicou, "agora mesmo" hai un "número importante" de contratacións con respecto a outros anos debido ás incorporacións pola pandemia de covid e o proceso de vacinación, "e iso probablemente fai máis difícil a cobertura do cento por cento das ausencias". En todo caso, engadiu, "hai un labor de planificación" por parte das unidades sanitarias "para axustar" as vacacións do persoal.
"Trabállase nese sentido, para que non haxa problemas e para compatibilizar a actividade asistencial co descanso dos traballadores", aseverou, á vez que agradeceu a "colaboración" do persoal.
Quixo precisar que "as camas non desaparecen", senón que se fai unha "optimización" deses recursos
Por outra banda, con respecto ao peche de camas durante o verán na área sanitaria de Vigo (que os sindicatos cifran en 135, un 12,6 % do total), o conselleiro non quixo precisar cifras xa que se trata dun "número variable".
Así, recordou que todos os veráns planifícase a actividade tendo en conta os períodos de vacacións dos profesionais, así como o habitual descenso na demanda de atención. "Froito de todo iso faise unha planificación de axuste de oferta de recursos hospitalarios á demanda", afirmou.
Con todo, quixo precisar que "as camas non desaparecen", senón que se fai unha "optimización" deses recursos, pero seguen estando "dispoñibles" e "se son necesarias, por suposto que, de forma inmediata, habilítanse outra vez".
Así mesmo, recordou que o Sergas ten autorizado un "programa específico de recuperación da actividade que non se puido facer durante a pandemia", especialmente a cirurxía, pero tamén consultas e probas, polo que a previsión é que, "aínda que sexa verán", "siga habendo consultas, probas e intervencións cirúrxicas que non se puideron facer estes meses atrás".
