O presidente do Goberno, Pedro Sánchez, anunciou este domingo que o Consello de Ministros do martes aprobará unha "drástica redución" das peaxes da AP-9, que se materializará "a partir da próxima semana".
Este anuncio fíxoo Sánchez durante a súa intervención na cerimonia de entrega da Medalla de Ouro de Galicia a todo o persoal que integra o dispositivo de vacinación contra o covid-19. O acto, celebrado no Museo Centro Gaiás da Cidade da Cultura, en Santiago, estivo presidido tamén polo rei Felipe VIN e o presidente da Xunta, Alberto Núñez Feijóo, e contou coa presenza de numerosas autoridades, entre elas o presidente do Tribunal Constitucional, Juan José González Rivas, e das vicepresidentas primeira e segunda do Executivo central, as galegas Nadia Calviño e Yolanda Díaz, respectivamente.
O presidente do Goberno, Pedro Sánchez, aproveitou o seu discurso para reivindicar as "probas inequívocas" do "compromiso" do seu gabinete con Galicia, que son a chegada da alta velocidade ferroviaria á comunidade, prevista para finais de ano; e a rebaixa das peaxes da AP-9.
En referencia a isto último, Sánchez prometeu unha redución "histórica" do prezo da Autoestrada do Atlántico. En concreto, será o Consello de Ministros do martes o que aprobe un abaratamento que suporá un aforro de 2.300 millóns de euros "ata o fin da concesión" da vía en 2048.
Esta medida que afectará a un "elemento imprescindible para a mobilidade" dos galegos materializarase, engadiu, a partir da "próxima semana". "Vai permitir desviar a circulación de rutas alternativas e xa que logo mellorar algo, que sei que é moi sentido por parte do conxunto da sociedade galega, a seguridade viaria", agregou.
Ademais, sobre a "inminente" chegada do Ave á comunidade prevista para os últimos meses de 2021, Sánchez afirmou que suporá "un antes e un despois na historia de Galicia e de toda España".
"DOUS FITOS". Estes dous "fitos" enmarcounos o presidente na folla de ruta do Goberno de España para "liderar o camiño da recuperación da man dun Ano Santo Xacobeo que é especial". Xunto a iso, mencionou a cohesión territorial como "un dos enormes retos" do actual século.
"Nesta crise non podemos deixar a ninguén atrás", aseverou Sánchez, referíndose non só ás persoas, senón tamén a todos "e cada un dos territorios de España" para que todos os cidadáns "teñan os mesmos dereitos e os mesmos servizos".
De feito, recoñeceu a Galicia como unha terra cunha identidade "orgullosamente rural", polo que "merece que se atenda con urxencia" o reto demográfico e o impulso das infraestruturas públicas.
"VER POR FIN O AVE ENTRANDO A GALICIA". Precisamente, o presidente da Xunta empregara o seu discurso para pór o foco na "recuperar o pulso" de Santiago e o Camiño neste 2021 que non só é Ano Santo, senón que tamén é o ano no que espera "ver por fin a Ave entrando a Galicia", tal e como reivindicou.
Neste punto, Feijóo tamén insistiu no "impulso" que suporán os fondos 'Next Generation' para "pór os cimentos dos ambiciosos proxectos de reactivación" da economía. "Presidente, esperamos que a túa presenza hoxe aquí supoña un respaldo a todos estes grandes retos que temos por diante, nos que necesitamos a cooperación e o apoio de todos para que sexa un éxito", apeláralle o mandatario galego.
