Unha persoa perdeu a vida e outras tres resultaron feridas logo de sufrir unha saída de vía contra unha vivenda, en Culleredo.
O sinistro ocorreu a pouco de dar as tres e media da madrugada, na estrada DP-3109, ao redor do punto quilométrico 1, en Almeiras. O aviso ao 112 Galicia deullo unha testemuña da colisión do turismo contra unha casa do lugar.
Unha vez recollida toda a información, os operadores do Centro Integrado de Atención ás Emerxencias de Galicia (CIAE-112) llo notificaron ao persoal sanitario, aos Bombeiros de Arteixo, aos axentes da Garda Civil de Tráfico e da Policía Local e a Protección Civil.
Xa no lugar, a patrulla da Policía Local confirmou que un dos ocupantes estaba falecido e que había tres persoas máis feridas. Pola súa banda, os Bombeiros de Arteixo comunicáronlle ao 112 que, a causa do impacto, tiveron que sufocar parte do motor do coche que comezou a arder.
REDONDELA. Por outra banda, dúas persoas resultaron feridas nunha colisión entre tres coches, en Redondela.
Ao redor das oito da tarde do venres, un particular chamou ao 112 Galicia para informar dun choque múltiple que se acababa de producir na estrada N-555, á altura do lugar de Negros.
Na chamada, a testemuña afirmaba que non había ninguén ferido e desde o 112 deuse aviso á Garda Civil de Tráfico e á Policía Local que, chegados ao lugar, confirmaron que había persoas implicadas que necesitaban asistencia médica. Así, alertouse ao 061, aos Bombeiros de O Porriño e a Protección Civil do concello.
Finalmente, o persoal sanitario indicou que habían resultado feridas dúas persoas.
