Rueda sinala sobre os abortos que "hai unha lei" e enxalza a calidade da sanidade galega

O vicepresidente da Xunta, Alfonso Rueda, sinalou este venres, na semana en que se coñeceu que o Sergas investigará se houbo mulleres que abortaron en centros sanitarios galegos sen suficientes garantías, que existe unha lei, e enxalzou a calidade do sistema de saúde.

"Nestes anos quedou claro, vendo por exemplo o ocorrido noutras comunidades autónomas, o esforzo que se fixo por manter o elevadísimo nivel sanitario que ten a sanidade pública galega", dixo en termos xerais ao ser preguntado respecto diso nun acto público con outra temática.

Sobre esta cuestión concreta, abundou en que a norma permite unhas posibilidades de obxección de conciencia, "pero tamén é certo que a lei é clara", e aquelas mulleres que desexen abortar "teñen o dereito a facelo" e está a "obrigación da sanidade pública" a prestar esa asistencia.

Rexeitou "recortes" que inflúan en tal cumprimento e remarcou que "o esforzo en xeral para manter o nivel da sanidade pública galega foi patente estes anos e así segue sendo".

O vicepresidente da Xunta puxo en dúbida que a pacientes se lles aconsellase ir a Madrid para interromper o embarazo, e, ante as consultas acerca das críticas formuladas en tal sentido, expuxo que se a realidade fose esa, "non me parecería adecuado", pero "nada fai presupor que iso sexa así. A obrigación é cumprir o que fai a lei e iso temos que facer".