O secretario xeral do PP galego, Alfonso Rueda, considerou hoxe que sería "incoherente" coa estratexia que vén mantendo o seu partido que o alcalde de Santiago, Ángel Currás, tivese que dimitir de xeito automático tras coñecerse a súa segunda imputación.
No entanto, destacou nunha comparecencia ante a prensa que espera ter a oportunidade de reunirse hoxe con el para que "diga o que ten que dicir" aos órganos do partido.
Un xulgado de Santiago abriu dilixencias previas tras a denuncia por presunta prevaricación e suposto acoso dun mando policial coa imputación do alcalde da cidade, o seu antecesor no cargo, Gerardo Conde Roa, e outras dúas persoas do gabinete municipal.
Alfonso Rueda destacou a presunción de inocencia do alcalde e o seu respecto polas actuacións da xustiza a preguntas da prensa tras manter este mediodía a primeira reunión cos recentemente elixidos vicesecretario xeral, Agustín Hernández; portavoz, Paula Prado e Alejandro Gómez, coordinador de organización.
Sobre a situación do rexedor destacou, como fai "en todos os casos", a presunción de inocencia e o seu respecto á actuación xudicial, á vez que desvinculou a primeira imputación do alcalde no caso Pokemon e a da denuncia do mando policial porque son "cousas absolutamente diferentes, sen entrar a axuizar se unha é máis grave que a outra".
Sobre se cre que Currás debería dimitir para non seguir deteriorando a imaxe da cidade, Alfonso Rueda subliñou que, "desde logo", ao alcalde de Santiago e á dirección do partido gustaríalle que esta imputación ou calquera outra non se tivera producido.
Pero "temos que insistir moitísimo en que non se pode, en ningún caso, equiparar imputación a culpabilidade, nin pensar que todas as imputacións teñen a mesma gravidade, hai que ver por que causas son e ver como se desenvolven os procesos xudiciais e, por suposto, a partir de aí, a aplicación dos nosos estatutos".
Respecto de Currás, apuntou, "non teño ningunha outra novidade que se mantén no cargo" e recordou que sobre a primeira imputación no caso Pokemon o xuíz non decretou ningunha medida cautelar e a segunda "acabamos de coñecela".
"Pero diso a dicir que porque se produza esta imputación tense que producir unha dimisión automática, creo que sería absolutamente incoherente con todo o que vimos mantendo neste tipo de situacións durante este tempo, que cremos que é o correcto e o que hai que facer".
POLÉMICA EN AMES E PONTEVEDRA
Ademais de cuestións organizativas, Rueda subliñou que o novo equipo elixido este fin de semana no congreso popular abordará as "disensións internas" dos últimos días nos municipios de Santiago, Ames e Pontevedra, que son "motivo de preocupación" para o PP de Galicia.
Subliñou que xa no congreso do PP deste fin de semana destacouse a "marca de unidade interna" da súa forza política e o convencemento de que os cidadáns reclaman que "traballemos unidos" para solucionar os seus problemas "e non que se perda o tempo en discusións internas".
Insistiu ademais en que a unidade do PP é "unha das cousas" que máis aprecian os cidadáns fronte ás "pelexas continuas", polo que cada vez que se produza un conflito interno "imos facer todo o posible para reconducilo" co obxectivo de que nos dediquemos a solucionar os problemas cara a fóra" e "non perdamos tempo en pelexas internas".
