O vicepresidente da Xunta, Alfonso Rueda, confía en que os orzamentos para o próximo ano sexan "menos restritivos" que os do presente exercicio.
En declaracións á Radio Galega, Rueda recordou que Galicia leva "moito tempo facendo esforzos" que agora ven como necesarios para estar máis "desafogados" que outras Comunidades que non os fixeron no seu momento.
Por iso, insistiu en que Galicia terá que facer esforzos, pero "non tan intensos" como outras administracións.
Preguntado por posibles cambios na Xunta, recordou que as eleccións se celebraron fai menos dun ano, pero, en calquera caso, trátase dunha competencia do presidente.
Sobre o inicio de curso en Soutomaior, resaltou que observara "máis optimismo no ambiente" e un Rajoy "forte" e "confiado" e "centrado no fundamental", que é a preparación da recuperación económica que se albisca polos mellores datos económicos.
En canto ao caso Bárcenas, dixo que "está aí", pero agregou que sobre este asunto xa dera explicacións cumpridas o presidente do Goberno e está "en mans da Xustiza, que é a que ten que decidir".
Para o vicepresidente galego "o que non pode facer un presidente do Goberno é estar a expensas do que diga un señor que agora mesmo está no cárcere".
Do anuncio da baixada de impostos por parte de Mariano Rajoy, Roda considerou que era "bo" e "valente" e "fala ás claras" dos bos datos e o "bo traballo" que se veu realizando, que abriu "espazos para ser optimistas".
Aínda que considerou que un pacto polo "uso racional do monte axudaría moitísimo", agregou que o "fundamental" é que o monte arde porque alguén o queima e demandou que se ''aparque a demagoxia" e este asunto quede "fóra da política".
