O conselleiro de Cultura, Educación e Universidade, Román Rodríguez, explicou que o Plan de Nova Arquitectura Pedagóxica que prepara a Xunta prevé que os centros educativos estean configurados para afrontar os retos "do futuro", de modo que dean resposta non só ás "necesidades académicas", senón "tamén as sanitarias e as tecnolóxicas".
Así o asegurou Rodríguez durante unha visita realizada este sábado ao CEIP Joaquín Loriga de Lalín, un colexio no que precisamente a Administración acometerá unha rehabilitación integral que se rexerá segundo as premisas marcadas no plan.
Trátase dun documento que o pasado xoves aprobou o Goberno galego, con 191 millóns de euros entre 2021 e 2024 destinados aos 1.100 centros públicos de ensino de titularidade da Xunta, que pretende que estas instalacións acollan actividades para a poboación xeral.
O conselleiro de Educación espera que este plan supoña "un cambio radical de concepto" en canto ao deseño dos centros, que a partir de agora estarán "pensados e configurados para afrontar os retos educativos do futuro".
ROLDA DE CONTACTOS. Agora, unha vez recibiu o visto e prace por parte do Consello da Xunta, abrirase unha rolda de contactos para enriquecer o documento final e convertelo na folla de ruta dos colexios e institutos da etapa poscovid, de modo que a súa arquitectura teña unha orientación educativa.
O conselleiro de Educación destacou este sábado que o Plan de Nova Arquitectura Pedagóxica é froito "dunha profunda e necesaria reflexión neste contexto de pandemia", que puxo de manifesto "a importancia do colexio non só como un lugar para adquisición de coñecementos, senón tamén como lugar de encontro e de interacción social, onde os nenos pasan a maior parte do seu tempo".
O documento "será a guía para a definición e o deseño dos novos espazos educativos", de modo que "dean resposta ás necesidades educativas, sanitarias e tecnolóxicas do futuro" con espazos abertos á interacción social e, incluso, "máis sostibles" a nivel ambiental.
Así, todas as reformas de espazos e os novos centros educativos que leven a cabo en Galicia ata 2024 —cuxas actuacións específicas concretará a Xunta "proximamente"—, seguirán as pautas e os obxectivos incluídos no plan.
