Adif restableceu na tarde deste xoves o tráfico ferroviario na liña Vigo-Ourense-Monforte, que estaba interrompido desde o pasado venres debido a unha focha provocada polas fortes choivas rexistradas na zona de Frieira, en Crecente.
Segundo informou o Administrador de Infraestruturas Ferroviarias, as precipitacións de hai case unha semana provocaron un "desguarnecido" de vía á altura do desvío número 1 da estación de Frieira, o que causou unha focha de 12 metros e inestabilidade do terreo circundante. O incidente afectou tamén ao macizo dun tirante dun poste de electrificación.
Adif sinalou que, tras a incidencia, Renfe "estableceu desvíos puntuais" vía Santiago para trens de longa distancia e transbordos por estrada para servizos de media distancia.
Na última semana persoal de mantemento de Adif traballou "día e noite" para restablecer a circulación "canto antes". As tarefas víronse condicionadas pola dificultade de acceder á zona —tanto para persoal como para maquinaria— e pola climatoloxía adversa.
