O innovador respirador que desenvolve un consorcio de empresas galegas, unha máquina tan demandada durante esta urxencia sanitaria, será testado a próxima semana en porcos, unha vez que saíu airoso no ensaio clínico realizado co pulmón artificial do complexo hospitalario da Coruña (Chuac).
Nesa proba con animais, que levará a cabo na Fundación Profesor Nóvoa Santos —un dos socios do consorcio—, o respirador deberá "garantir soporte vital entre 6 e 24 horas", segundo explicou Jacobo Penide, que é o director xeral da tecnolóxica que lidera o proxecto, Bionix.
Se esa proba é exitosa, xa o podería homologar a Axencia Española de Medicamentos e Produtos Sanitarios, coa que mantén contactos. Se as previsións se cumpren, na seguinte semana realizará os ensaios clínicos en humanos, que é o paso previo para comezar a produción.
O consorcio ten capacidade para producir un milleiro de respiradores á semana
No mellor dos escenarios posibles, dentro de 15 días empezaría a fabricación a escala deste dispositivo denominado Freesterra-I, acrónimo de "libre" e do "final da Terra".
O consorcio galego pode producir "uns 1.000 respiradores á semana" co fin de abastecer aos hospitais "en función da demanda", segundo precisou Jacobo Penide.
O director xeral de Bionix asegurou que o consorcio constituído para desenvolver o respirador "ten capacidade de fabricar, pero non descartamos que teñamos que recorrer á industria para escalar esa produción".
No desenvolvemento deste innovador dispositivo, que contou co asesoramento de anestesistas e neumólogos, está a traballar o enxeñeiro informático lucense David Maseda Neira. No proxecto liderado por Bionix tamén participa o Clúster TIC Galicia; as empresas Cinfo, Electrónica&Comunicacións, Dimalnox, i3DAtlántico e Blanco Mayer e a fundación Profesor Nóvoa Santos.