O exalcalde de Vigo, Ventura Pérez Mariño, de 72 anos de idade, permanece ingresado en planta do Hospital Álvaro Cunqueiro da cidade olívica, onde foi evacuado a última hora deste mércores, tras ser rescatado do mar nunha praia de Aldán, en Cangas cando sentía indisposto.
Segundo informaron fontes do 112 Galicia e de Urxencias Sanitarias-061, un particular chamou a Urxencias pouco antes das 21,00 horas do mércores, para alertar de que varias persoas sacaran do mar a un home "cun baixo nivel de consciencia".
Ata o lugar, nunha praia da parroquia canguesa de Aldán, desprazáronse unha ambulancia e un facultativo do PAC de Cangas, así como unha ambulancia medicalizada con base en Vigo, que foi a que trasladou a Pérez Mariño ao hospital.
Ademais dos servizos de Urxencias Médicas, o 112 tamén alertou á Policía Local e ao servizo municipal de Protección Civil, así como a Salvamento Marítimo e Servizo de Gardacostas de Galicia.
O exalcalde de Vigo ingresou polo servizo de Urxencias do hospital vigués e, segundo puido confirmar Europa Press, permanece ingresado en planta. Fontes próximas á familia sinalaron que "o momento crítico xa pasou" e "parece que se vai a recuperar".
Ventura Pérez Mariño, maxistrado xa xubilado, foi deputado entre 1993 e 1995 como fichaxe estrela de Felipe González xunto con Baltasar Garzón naquela campaña, e anos despois, en xuño de 2003, foi investido alcalde de Vigo polo PSOE e formou goberno co BNG de Lois Pérez Castrillo.
As diferenzas en materia de política urbanística acabaron cunha ruptura do pacto e desembocaron nunha moción de censura, na que o socialista perdeu a alcaldía, que foi asumida por Corina Porro (PP) en decembro dese ano, cos votos do seu grupo e do BNG.
