O helicóptero Pesca-1 do servizo de Gardacostas de Galicia rescatou este venres a unha muller que caeu nas Pozas do Can Loureiro, en Muros, e trasladouna ao Complexo Hospitalario Universitario de Santiago, informou o 112 Galicia.
Foi unha menor, filla da ferida, quen avisou ao 112, sobre as 12:00 horas, de que a súa nai caera neste punto nunha zona de difícil acceso do río Rateira, na parroquia de Abelleira. Entón, os xestores do 112 Galicia informaron o Servizo de Urxencias Sanitarias de Galicia-061, ao GES de Muros, á Policía Local, á Garda Civil e aos Bombeiros de Cee.
🚁 O Pesca 1 foi mobilizado para un rescate na zona de Muros dunha muller que caeu nunha zona de difícil acceso.
— Gardacostas Galicia (@GardacostasGal) August 27, 2021
Posteriormente foi trasladada ao Complexo Hospitalario Universitario de Santiago. pic.twitter.com/ayKzqLYwcH
Cando deron co punto exacto do incidente, os medios de emerxencias confirmaron que a muller se atopaba sentada nunha pedra, pero non se podía mover e para chegar a ela o acceso era complicado. Así, solicitouse a intervención do servizo de Gardacostas de Galicia para que desprazasen ata o punto un helicóptero e tratar así de chegar á ferida para poder evacuala.
