As principais conexións por estrada entre Asturias e Galicia, a autovía A-8 e a N-634, que permanecían cortadas ao tráfico por mor dos incendios forestais foron reabertas, non así a liña de ferrocarril que une ambas as comunidades, que segue pechada, segundo fontes do Servizo de Urxencias do Principado de Asturias (SAIBA).
A Unidade Militar de Urxencias (UME) incorporarase aos labores de extinción do case centenar de incendios que se manteñen activos en Asturias, principalmente na zona do occidente, informou o conselleiro de Presidencia do Principado, Guillermo Martínez.
Martínez explicou en declaracións aos medios que a situación é "complicada" ante os fortes ventos, as altas temperaturas e ausencia de choivas, aínda que se espera que as condicións meteorolóxicas sexan máis favorables nas próximas horas.
Martínez, quen afirmou que "todo parece indicar" que algúns dos incendios poidan ser provocados, explicou que se pasaron dos dezaoito focos activos á primeira hora da mañá a 99 nestes momentos.
O punto crítico destes incendios, nos que non hai constancia de danos persoais, atópase no occidente, nos concellos de Cangas del Narcea e El Franco, onde as chamas afectaron a cinco vivendas e unha cuadra, aínda que tamén hai lumes activos na zona central e no oriente da rexión.
Martínez, quen apuntou que a prioridade é "salvagardar" ás persoas e os bens, activou ás 21:00 horas a situación 2 do Plan de Incendios Forestais do Principado de Asturias (INFOPA), o que permite a intervención de medios non asignados ao plan como a UME.
A Unidade Militar de Urxencias desprazará a Asturias unha compañía cun centenar de efectivos, catorce autobombas, tres nodrizas e un vehículo recoñecemento.
Nestes momentos traballan na extinción dos incendios 230 efectivos do corpo de bombeiros e de diferentes cooperativas forestais, pertencentes ao Principado, ao que hai que sumar máis persoal da Garda Civil e Protección Civil, precisou o conselleiro, así como a totalidade dos medios terrestres dispoñibles.
Guillermo Martínez explicou que na xornada deste sábado os fortes ventos do sur, que se achegaron aos 100 quilómetros por hora, imposibilitou a saída de medios aéreos.
A previsión meteorolóxica apunta á chegada de choivas, aínda que nestes momentos só orballa moi levemente nalgunhas das zonas afectadas polos lumes, así como unha baixada de temperaturas.
Reabren as conexións por estrada entre Asturias e Galicia pero non o tren
Todo apunta a que algúns dos numerosos incendios que arrasaron a comunidade asturiana durante todo o sábado e que afectaron as comunicacións foron provocados
