Rajoy participará na homenaxe a Fraga deste sábado

O presidente do Goberno, Mariano Rajoy, participará este sábado en Santiago nunha homenaxe do PP galego a Manuel Fraga.

Así o confirmou en conferencia de prensa o secretario xeral do PPdeG, Alfonso Rueda, quen explicou que se tratará dun "acto sinxelo", no Auditorio de Galicia, no que tamén intervirá o presidente da Xunta, Alberto Núñez Feijóo.

O secretario xeral do PPdeG apuntou tamén "a intención" de que na homenaxe participe unha neta de Manuel Fraga, así como o ex presidente da Xunta, Gerardo Fernández Albor.

Rueda dixo que primeiro foran os actos organizados pola familia, os funerais na intimidade familiar, despois o funeral institucional que organizou a Xunta de Galicia e restaba, "como non podía ser menos", a homenaxe que os 100.000 militantes do partido en Galicia quere render a Manuel Fraga.

Ademais das intervencións apuntadas, na homenaxe ofreceranse vídeos e imaxes da vida do dirixente falecido.

Aínda que insistiu en que os organizadores desexan "un acto sinxelo", Rueda augurou que o recinto estará "a rebordar" e anunciou a confirmación de asistencia de militantes doutras Comunidades autónomas.

Comentarios