O Colexio Oficial de Químicos de Galicia e a Asociación de Químicos de Galicia (Colquiga) proponse abrir un debate entre os protagonistas que participan na educación na comunidade sobre as novas tendencias na didáctica da química, unha materia que consideran "básica" na formación dos mozos. Esa inquietude é o motor da organización do I Congreso Didáctica da Química, que se celebrará no CIFP Politécnico de Santiago de Compostela entre o 4 e 5 de outubro.
"Queremos implicar todos os estamentos que participan no proceso educativo en Galicia para coñecer as necesidades, propostas, tendencias e metas que pretende alcanzar a didáctica da química en Galicia", asegura Manuel Rodríguez Méndez, decano de Colquiga e presidente da Asociación de Químicos de Galicia, quen destaca que "é necesaria unha posta ao día
O congreso está dirixido a profesores de secundaria de centros públicos e privados, a profesores de CIFP e de universidade e a estudantes de máster de profesorado.
ORIXE. A asociación e o colexio xa impulsaron en 1995 as I Xornadas Galegas sobre a Didáctica da Química, que se celebraron en Santiago na facultade de Químicas. Alí abordouse o ensino da química desde todas as súas facetas: teoría, laboratorio, técnicas de ensino. E agora, en 2019 "retómase aquela vella idea", en formato congreso, co propósito de que "sexa un punto de encontro onde os profesionais poida coñecer, compartir e intercambiar experiencias que melloren o seu labor docente da química".
As inscricións ao congreso poden facerse en www.colquiga.org. A Consellería de Educación recoñecerá ao profesorado de química un conxunto de horas para contabilizar na súa promoción.
