Co incendio que evoluciona "favorablemente" as miradas están agora postas en posibles rebrotes na xornada do xoves marcada polas altas temperaturas, mentres os servizos de extinción seguen traballando para protexer os núcleos habitados.
Como consecuencia do virulento incendio, que chegou a atravesar de lado a lado a aldea, chegou a rodear un parque infantil, moitas viñas quedaron seriamente danadas e tamén se perderon árbores e hortos, así como centos de colmeas nesta zona eminentemente do rural.
O lume, que arrincou o mércores pola tarde no núcleo de San Millao, no concello de Cualedro, saltou en cuestión de minutos ao pé das casas en Monterrei, pondo en risco aos veciños desta zona ante o seu avance por leiras particulares favorecido polo forte vento reinante.
Os veciños resumen nunha frase o vivido a noite do mércores: "Foi un auténtico inferno". "Non aguantabas na casa, afogabámosnos co fume", comenta Antonio, un veciño, quen ve "difícil" atopar unha solución a esta secuela dos incendios que cada ano castiga á provincia de Ourense e que xa deixa centos de hectáreas calcinadas.
Proba da súa virulencia, é que as chamas chegaron a superar por momentos os sete metros de altura, cos continuos cambios de vento. "Se non fose pola miña parella, ardese todo", resumía unha afectada.
Existe un malestar xeneralizado entre a poboación dos municipios, que considera que a intervención debería ser máis rápida
Pese ao acougo actual, o malestar aínda continúa latente nestas zonas, onde están convencidos de que o incendio "podería evitarse" se se producira unha rápida intervención dos medios de extinción.
Non en balde, unha afectaba aseguraba que o helicóptero "non botou unha pinga de auga", queixa na que coincidiron outros veciños que optaron por non abandonar as súas casas para combater o lume, moitas veces avivado pola maleza que se acumula en moitas leiras sen limpar.
Sobre este último punto, un veciño, Juan Antonio Fernández, reclamou que se obrigue aos propietarios a rozar os seus terreos para evitar que se repitan este tipo de situacións nunha comarca que, cada ano, vese castigada polos incendios.
A maioría de veciños, visiblemente indignados, sinalan que isto non se pode consentir" e piden unha solución a este problema que cada ano castiga á provincia de Ourense. "Se houbese o vento que houbo días atrás, moitos pobos terían moito problema", resolvían.
Polo momento, o incendio sitúase como o de maiores dimensións no que vai de verán en Galicia e obrigou a intervir a efectivos da Unidade Militar de Urxencias (UME) que continúa na zona colaborando nas tarefas de extinción.
