A Xunta de Galicia abrirá o próximo día 17 de xaneiro o prazo de solicitudes para que particulares, empresas e autónomos accedan ás axudas do programa Renove Automoción, o plan galego de transición cara a unha mobilidade eficiente.
Con esta iniciativa, que cumpre a súa terceira edición, o Goberno galego destina 2,5 millóns de euros a apoiar a adquisición duns 1.100 vehículos energéticamente eficientes. Os apoios son válidos para vehículos comprados a partir do 1 de xaneiro.
O obxectivo desta proposta da Vicepresidencia segunda e Consellería de Economía, Empresa e Innovación é promover a substitución de vehículos de certa antigüidade por outros novos e eficientes que reduzan a emisión de gases de efecto invernadoiro e melloren a calidade do aire, tendo en conta que o parque móbil galego ten unha media de 14 anos.
Deste xeito, reduciranse as emisións de CO2 equivalentes á acción de plantar 36.000 árbores e favorecerase unha redución de custos de 300.000 euros anuais na mobilidade, así como dun aforro enerxético equivalente a 274.000 litros de gasóleo.
Estes apoios destínanse tanto a beneficiar a particulares que teñan a súa residencia habitual en Galicia –que poderán adquirir un único vehículo co Renove Automoción–, como a autónomos e empresas con domicilio social ou centro de traballo na Comunidade, que poderán comprar ata 10 unidades con estas axudas.
A convocatoria inclúe a adquisición de vehículos novos –turismos e furgonetas– con custo inferior ou igual a 40.000 euros. Será requisito imprescindible que o adquirente acredite a baixa definitiva en circulación dun vehículo a achatarrar de polo menos 10 anos no caso dos turismos e de cinco no das furgonetas.
As axudas son de concorrencia non competitiva e tramitaranse a través das entidades colaboradoras, que xa teñen o prazo aberto para adherirse –de feito, nestes momentos hai unhas 70–. Estes apoios oscilarán entre os 3.000 e os 4.000 euros segundo o tipo de vehículo, dos que a Xunta achegue 2.000 e 3.000, respectivamente, e o concesionario 1.000. A cantidade increméntase nun 20% para as familias numerosas, polo que poden alcanzar os 3.400 e 4.600 euros.
Ata o momento, o Renove Automoción destinou nas súas anteriores convocatorias un total de 1,8 millóns de euros para apoiar a adquisición de 759 vehículos. A Xunta sinalou que se trata dunha iniciativa que foi acordada co propio sector e que promove a recuperación económica, reducindo os custos enerxéticos dos fogares, pero tamén das empresas que poden ver mellorada a súa competitividade.
