Deputados do PP polas provincias de Ourense e Lugo reclamaron este sábado tanto ao Ministerio de Transportes como a Adif, a rectificación da eliminación das variantes ferroviarias de Peares-Canabal e Rubián, previstas e comprometidas no plan de mellora da liña Ourense-Lugo.
Nun acto celebrado na estación de Monforte de Lemos, no que se reuniron os deputados Celso Delgado, Ana Vázquez, Jaime de Olano e Joaquín García, acusaron ademais á presidenta de Adif, Isabel Pardo de Vera, de faltar "á verdade" nas súas "escusas para xustificar que a alta velocidade non chegue a Lugo".
Para os populares, as dúas variantes ferroviarias reducirían ata en 23 minutos a distancia de 117 quilómetros que separan as dúas capitais en tren e "permitiría aos lucenses aproveitar a conexión da Ave en Ourense e viaxar a Madrid en pouco máis de tres e un cuarto".
Ao encontro tamén asistiron os senadores populares, as deputadas autonómicas Elena Candia (presidenta provincial do PP) e Raquel Arias, así como o portavoz provincial do PP, Javier Castiñeira, e a portavoz en Monforte, Katy Varela.
No acto, os populares confirmaron que rexistraron unha solicitude de comparecencia no Congreso do Ministro de Transportes, José Luís Ábalos, e da presidenta de Adif para "rectificar as intencións de non executar esas dúas variantes".
Segundo Celso Delgado, trátase dun tema que motivou o pasado mes de febreiro unha iniciativa parlamentaria na que só obtiveron "respostas evasivas e non concretas sobre o tempo administrativo destes proxectos e as datas que se manexan para licitación", o cal "xerou unha dubida moi razoable sobre a intención do Executivo central de abandonar ou pospor a súa execución sen unha data definida".
Para os populares, Ábalos e Pardo "desprezan unha redución do traxecto entre Ourense e Lugo de 23 minutos, que reduciría o traxecto total a unha hora e deixaría Madrid en 3 horas e 20 minutos".
Unha situación moi diferente á actual, na que os trens máis rápidos invisten 94 minutos no traxecto entre Ourense e Lugo, cunha velocidade media de 74 quilómetros por hora que elevaríase a 85 coas melloras e electrificación da vía entre Monforte e Lugo, aseguraron.
E é que segundo Delgado, Pardo de Vera ademais "falta á verdade", pois nunha entrevista o pasado 14 de marzo afirmou que "cando chegou non había nada sobre Lugo-Ourense e non sabían canto medían os túneles".
Para o deputado isto é un "disparate", pois "a señora Pardo de Verachegou a Adif en 2007", polo que "é moi difícil crer que non o coñecese".
Segundo os populares, o que si que omitió Pardo foi "dicir que a primeira presentación destas melloras na conexión ferroviaria tiveron lugar na cidade de Lugo en maio de 2018, sendo entón ministro de Fomento Íñigo da Serna, na executiva de Mariano Rajoy, cando tiñan un orzamento de máis de mil millóns de euros, agora reducido a 550 millóns".
Neste sentido, os parlamentarios defenderon que "durante a etapa de goberno do Partido Popular impulsouse a modernización desta liña, con decisións efectivas e concretas".
Os dous únicos contratos adxudicados ata a data, a reparación de 23 pontes e a derriba, "puxéronse en marcha precisamente grazas á asistencia técnica encargada e planificada polo goberno de Rajoy e o ministro Íñigo da Serna", abundaron
