Portugal nega o peche dos pasos fronteirizos aínda que si haberá controis

Os vehículos de fóra de España si deberán entrar por Tui ou Chaves ao país veciño con motivo da visita do papa a Fátima pero o resto de puntos estarán abertos ► A Policía e a 'guardinha' colaborarán na fronteira
Preparativos de los controles en el paso fronterizo de Tui-Valença por la visita del Papa a Fátima
photo_camera Preparativos de los controles en el paso fronterizo de Tui-Valença por la visita del Papa a Fátima

A polémica pola reposición dos controis fronteirizos entre España e Portugal con motivo da visita do Papa a Fátima está servida. A Garda Nacional Republicana (GNR) de Portugal desmentiu agora que se vaian a pechar pasos fronteirizos, a diferenza do que anunciou este luns desde España a Garda Civil. O que si haberá, explican, son controis de documentación en todos eles, e o peche de pasos só afectará a vehículos de fóra de España, que no caso de viaxar desde Galicia deberán cruzar ou ben pola ponte nova de Tui ou polo paso ourensán entre Verín e Chaves entre a medianoite do martes ao mércores e a medianoite do sábado ao domingo.

Axentes da Policía Nacional española colaborarán co Servizo de Estranxeiros e Fronteiras (SEF) luso, e outros corpos policiais de Portugal, no dispositivo especial deseñado, que prevé o restablecemento dos controis fronteirizos. O obxectivo do operativo denominado operación Fronteira Branca é "garantir os actos programados e reducir ao máximo as posibles ameazas e problemas que puidesen xurdir", segundo informa o Ministerio do Interior. 

As autoridades policiais portuguesas solicitaron a colaboración da Policía Nacional española para o reforzo das súas fronteiras aéreas, marítimas e terrestres desde o día 10 ao 14 de maio.  Por iso, coordinados pola Comisaría Xeral de Estranxeiría e Fronteiras, desde a madrugada deste martes efectivos das Xefaturas Superiores de Policía de Galicia, Castela e León, Estremadura e Andalucía Occidental, xunto a axentes das Unidades de Estranxeiría e Documentación, a Unidade Central de Fronteiras, a BRIC, a Brigada Móbil e especialistas de Guías Caninos, colaborarán xunto aos policías portugueses neste dispositivo especial. 

Os obxectivos xerais son o control dos fluxos de persoas que proveñan de España; control de pasaportes, documentos nacionais de identidade e calquera outra documentación española; control da inmigración irregular e de posibles situacións de trata de seres humanos, e control de posibles grupos ou organizacións criminais. 

DOCUMENTACIÓN. Os policías españois prestarán apoio en catro dos cinco Centros de Cooperación Policial e Aduaneiros que España ten con Portugal, concretamente en Castro Marim-Ayamonte (Huelva), en Caya (Badaxoz)-Elvas; en Vilar Formoso-Fontes de Oñoro (Salamanca), e en Tui (Pontevedra)-Valença do Minho. 

Ante este restablecemento temporal dos controis, a Policía recorda a todas as persoas que se despracen a Portugal a necesidade de viaxar coa súa documentación persoal en vigor (DNI ou pasaporte), así como co carné de conducir e documentación do vehículo en caso de viaxar en transporte particular. Ante calquera urxencia que poida xurdir no país veciño, o teléfono de atención en Portugal é o 112.

Comentarios