A portavoz nacional do BNG, Ana Pontón, reclamou o "dereito" de pobos e cidadáns a cambiar as leis, incluída a Constitución, neste día en que se celebra o 41 aniversario da Carta Magna. Ademais, nun acto para visualizar as súas críticas ao texto, referiuse á actual situación política e chamou a Vox "aborto do PP".
Este venres, numerosos cargos do Bloque participaron en Santiago na realización dunha cadea humana ao redor do Museo do Pobo Galego, como acto simbólico en defensa da autodeterminación. Nunha intervención posterior, na Praza 8 de Marzo, Pontón criticou a Constitución por considerala un marco "esgotado" e que non serviu para solucionar os problemas de Galicia.
Engadiu que é un texto "dos privilexios duns poucos", entre os que incluíu a dinastía borbónica, unha institución "carca, antidemocrática e machista". Precisamente este xoves, a última hora, a Executiva Nacional do BNG informou da súa decisión de non participar na rolda de consultas de Felipe VI sobre a investidura do presidente do Goberno central.
No seu discurso, reivindicou que se estableza un novo estado político para Galicia, no que se recoñeza o que é, unha nación", e cargou tamén contra unha Constitución que foi redactada de xeito "tremendamente centralista", mediante a cal Madrid "foi a gran privilexiada".
Doutra banda, a portavoz nacionalista amosou a súa preocupación ante a extrema dereita e destacou que non "debe sorprender" que a dereita pacte con Vox, porque "non é máis que un aborto do Partido Popular".
CONSTITUCIÓN ANTIDEMOCRÁTICA. Pola súa banda, o deputado nacionalista no Congreso Néstor Rego subliñou que, neste 6 de decembro, os nacionalistas non teñen nada que celebrar e que "nunca defenderán unha Constitución antidemocrática". Fronte a isto, esgrimiu a "fortaleza que lles deu o pobo galego" ao situalos na Cámara Baixa e ratificou que defenderá o "dereito nacional de Galicia" á autodeterminación.
Na súa quenda, Rego enumerou, igual que faría despois Pontón, os problemas concretos aos que se enfronta a comunidade, entre os que destacou a inmigración, a industria, as pensións e a violencia machista.
