O Diario Oficial de Galicia (DOG) publicou este venres o plan de xestión de risco de inundacións da demarcación hidrográfica Galicia-Costa para o ciclo 2021-2027.
O texto establece como zonas cun grao significativo de influencia do cambio climático as subcuncas dos ríos: Ulla, Tambre, Mandeo, Eume, Lérez, Verdugo, Anllóns e a ría de Arousa.
O plan recolle medidas para minimizar o risco de inundacións por un importe de máis de 100 millóns euros, no que se inclúen as actuacións a realizar polas distintas administracións. Os interesados poden facer achegas ata o 30 de xullo.
O documento abarca 74 actuacións. As medidas deseñadas refírense á prevención, protección ante inundacións e recuperación para paliar efectos.
