As fotografías que cos seus teléfonos móbiles tomen os galegos nas praias de Rodas (Illas Cíes), Agrelo (Bueu), A Lanzada (O Grove) e Area Maior (Muros) poden ser a materia prima que faga posible monitorizar os ciclos de erosión e recuperación dos areais así como calquera outra dinámica costeira ou cambio a longo prazo.
É a ciencia cidadá, comunitaria e sen fronteiras do proxecto CoastSnaps, iniciativa que xurdiu en Australia en 2017, que chegou xa a 16 países e que en Galicia funciona da man de Rita González Villanueva, investigadora do grupo de Oceanografía Xeolóxica e Biogeoquímica da Universidade de Vigo.
"Monitorizar as nosas costas e, sobre todo, a erosión das praias é crucial para formular estratexias que poidan facer a costa máis resistente, pero require moito traballo", explica González Villanueva á revista da Universidade de Vigo, razón pola que se necesita a colaboración cidadá para que fotografen a costa cando vaian pasear.
Non son fotografías tomadas ao azar e desde calquera punto, senón que quen visiten estas catro praias galegas atoparán uns puntos de control instalados desde onde tomar unha fotografía que, despois, deben subir ás redes sociais do proxecto ou enviala aos investigadores.
Ata o momento xa se recibiron 1.582 imaxes, das que 730 corresponden ás bases da praia de Rodas, 658 a Agrelo, 127 á Lanzada e 70 a Area Maior
As fotos deberán tomalas apoiando os seus teléfonos nuns soportes instalados ao efecto, de modo que todas as instantáneas teñan a mesma perspectiva, polo que unha vez compiladas serven para realizar un time-lapse que permite ver como evoluciona a costa.
Ata o momento xa se recibiron 1.582 imaxes, das que 730 corresponden ás bases da praia de Rodas, 658 a Agrelo, 127 á Lanzada e 70 a Area Maior.
Se CoastSnaps recorre á cidadanía é porque a monitorización a longo prazo é difícil de conseguir, dado que sería necesario contar cun equipo que tomase fotografías desde o mesmo lugar durante moito tempo rexistrando grandes cantidades de información para ver como evoluciona a praia.
"É aquí onde a cidadanía pode axudar", sinala González Villanueva, "actuando como científicos e colaborando co seu gran de area".
