A Fiscalía pide penas que suman máis de 67 anos de cárcere para o salesiano Segundo C.V., que traballaba no centro María Auxiliadora de Vigo e ao que acusa de abusar sexualmente de seis menores durante un campamento de verán e nunha peregrinación a Santiago de Compostela.
O ministerio público reclama tamén que se lle impoña o afastamento e a prohibición de comunicarse cos menores, unha medida de liberdade vixiada por 8 anos, e a inhabilitación para desempeñar profesións ou ocupacións nas que puidese ter contacto con menores.
Así se recolle no auto ditado polo xulgado de instrución número 4 de Cambados, e no que se decreta a apertura de xuízo oral contra este relixioso e contra o colexio dos Salesianos de Vigo, como responsable subsidiario, por 11 delitos de abusos sexuais a menor de 16 anos e outro delito continuado de abusos sexuais, todo iso en relación a seis menores dese centro.
Ademais da acusación exercida pola Fiscalía, no auto tamén se reflicten as penas solicitadas pola Fundación Amigos de Galicia (que exerce a acusación popular e pide un total de 30 anos de cárcere) e as reclamadas polas acusacións particulares, exercidas por parte das familias dos nenos (que piden un total de 54 anos de cárcere).
RESPONSABILIDADE CIVIL
Ao marxe das penas privativas de liberdade, da prohibición de achegase aos menores ou comunicarse con eles, da inhabilitación e da medida de liberdade vixiada, as acusacións tamén reclamaron que se indemnice ás vítimas.
Así, o ministerio público solicita que Segundo C.V., ou subsidiariamente o colexio, indemnice aos seis menores nun total de 82.500 euros, polos danos morais e o trastorno de tensión postraumática.
A Fundación Amigos de Galicia reclama indemnizacións por un total de 82.000 euros; e as familias solicitan indemnizacións que suman un total de 140.000.
DETENCIÓN
Segundo C.V. foi detido en xullo de 2019, logo das denuncias de varios menores sobre supostos abusos durante un campamento de verán en Cambados. Ao longo da instrución, o xulgado determinou que o investigado podería cometer abusos tamén noutras ocasións, como nunha peregrinación a Santiago, en abril dese ano, ou en xuño, no centro xuvenil Abertal, ao que acudiu outro menor para ver un partido de fútbol.
En primavera de 2020 o seu defensa solicitou a súa saída de prisión (o fixera antes, pero sempre se lle denegou) e, tras un recurso estimado parcialmente, a Audiencia Provincial decretou a súa posta en liberdade provisional, baixo fianza de 12.000 euros.
