Un incendio forestal permanece activo no municipio ourensán Vilariño de Conso e afecta a unha superficie de 25 hectáreas do parque natural do Invernadoiro.
Segundo explicaron a Europa Press fontes da Consellería do Medio Rural, as chamas comezaron na parroquia de San Mamede de Hedrada ás 16,42 horas deste venres, e permanecen activas.
Nos labores de extinción desde o inicio do lume participaron dous técnicos, 14 axentes, 34 brigadas, 16 motobombas, unha pa, 15 helicópteros e oito avións.
INTENCIONALIDADE. A asociación ecoloxista Arco Iris sospeita que o incendio "pode ser provocado", e suxire que "unha man criminal está detrás da sistemática destrución deste espazo natural de enorme importancia".
A entidade asegura, nun comunicado, que a ausencia de tormentas os dous últimos días "exclúe calquera causa natural e apunta a unha clara intencionalidade" no incendio que aínda non foi controlado e que se produce case na mesma zona que os rexistrados en agosto.