Indubidablemente, a investidura de Pedro Sánchez terá repercusións en Galicia. E máis nun ano de eleccións autonómicas. Nesa clave, precisamente, foron as primeiras palabras que lle dedicou Sánchez, tras a súa elección, ao líder dos socialistas galegos: "A próxima será a túa". O novo presidente do Goberno e Gonzalo Caballero incluso pousaron exultantes nos corredores do Congreso.
Tamén exultante se mostrou o alcalde de Vigo e tío do candidato do PSdeG á presidencia da Xunta. Abel Caballero cualificou a investidura de Sánchez como "a mellor noticia" para a cidade, posto que o socialista "vai dicir que si a todo" o que o rexedor reclama.
O rexedor asegurou que Sánchez fixo máis por Vigo "que todos os presidentes da democracia xuntos" e destacou a reactivación de proxectos "que o PP paralizara", como a estación do Ave, a alta velocidade ferroviaria cara a Madrid ou a nova autovía Vigo-O Porriño.