O portavoz do Grupo Popular, Pedro Puy, defendeu este luns, ao cumprirse un ano do primeiro confinamento motivado pola covid-19, que a situación actual da pandemia permite lanzar unha mensaxe de "tranquilidade" sobre a evolución futura tras constatar a "profesionalidade" do persoal sanitario, "a capacidade de organización da administración e o propio civismo da sociedade, que acode ás vacinas dun xeito responsable e sen incidentes". Con todo, trasladou a preocupación do PP pola repartición que está a facer o Goberno central dos fondos europeos, porque "sempre aparece algún criterio que fai que Galicia reciba por baixo do que lle corresponde por financiamento autonómico ou por poboación".
"Levamos un ano facéndolle fronte en Galicia a unha pandemia sanitaria, durante a que tomamos moitas decisións que permitiron situar a Galicia por baixo da media de afectación, tanto a nivel sanitario, social como económico", subliñou. "A experiencia acumulada debe servirnos para que manteñamos a máxima precaución e seguir as recomendacións que nos fan desde os comités médicos e sanitarios, porque estamos nun momento no que as vacinas permiten ver unha saída ao final do túnel", engadiu.
CAPACIDADE PARA PÓR VACINAS. "Estamos a ver que Galicia ten capacidade para pór vacinas nun tempo relativamente rápido a grandes cantidades de poboación", destacou o portavoz popular, antes de lamentar que "os procesos de fabricación das vacinas van máis lentos do previsto". En todo caso, remarcou que existe "o consolo de que, grazas á Unión Europea, estes procesos de vacinación teñen unha compoñente social: vacínase a quen ten máis necesidade e a través do sistema público". E para o futuro, o portavoz popular considerou "moi probable que a principal secuela desta pandemia teña que ver co ámbito económico e social". Respecto diso, apuntou que "o comportamento de Europa tamén foi exemplar coa repartición dos fondos aos países máis afectados pola pandemia", situando a España como un dos principais países receptores destes fondos.
Neste sentido, Puy mostrou "certa preocupación polo desenvolvemento do marco de repartición destes fondos en España", porque "imos vendo que se reparten de tal xeito que sempre aparece algún criterio que se aparta da habitual distribución dos fondos autonómicos ou da mera repartición por poboación". Así, recordou que na última repartición polo Goberno central de 11.000 millóns de euros para autónomos, pequenas e medianas empresas, e hostalería, dos que 7.000 van directamente ás comunidades autónomas, "a cantidade concedida a Galicia non é equivalente polo que lle correspondería por financiamento autonómico nin por poboación".
"EXPECTANTES E PREOCUPADOS". Pedro Puy tamén recordou, no ámbito da automoción e a construción dunha planta de baterías eléctricas, que o Goberno central decidiu anunciar unha planta en Cataluña, "sen que finalizase o período de presentación de proxectos nin se coñezan os criterios de elección".
"Galicia ten capacidade para absorber este investimento: contamos cunha empresa tractora de referencia, que está a desenvolver vehículos eléctricos nas dúas liñas de produción, que ten apoio tanto da industria auxiliar e o compromiso da Xunta para levar adiante os proxectos de electrificación de vehículos", explicou. "Esta situación fainos estar expectantes, preocupados e demandantes de criterios de repartición claros" dos fondos europeos por parte do Goberno central, esgrimiu, antes de apostilar que é preciso pechar "criterios que teñan unha mínima concorrencia que implica que non se coñeza o resultado da elección antes de que se presenten os proxectos".
