O Parlamento de Galicia reclamou que a CRTVG elimine da radio e a televisión a publicidade de xogo presencial e online, independentemente da franxa horaria ou a programación na que se emita. A proposición, presentada polo grupo popular, recibiu o apoio de todos os grupos coa excepción de Común da Esquerda, que optou pola abstención ao non aceptar o PP unha emenda que pretendía estender a prohibición a todos os medios de comunicación.
O texto, que fai referencia á lei relativa ao xogo na que traballa o Goberno galego, subliña que esa actividade "debe ser obxecto dunha regulación exhaustiva e adecuada, tanto pola incidencia que pode ter na saúde como pola fonte de ingresos que supón para o erario público".
Así, apunta que os avances dos últimos anos derivaron na creación de novos "produtos de xogo" que obrigan a aplicar "axustes" na normativa para adaptarse ás "necesidades tanto do sector empresarial como dos usuarios". Neste sentido, chama a "protexer" os menores de idade e "sensibilizar" os mozos "eliminando calquera posibilidade de uso de técnicas de incitación ao xogo en relación cos sectores da poboación máis vulnerables".
Por iso, e tras avanzar que o novo texto lexislativo incluirá restricións na promoción do xogo para evidenciar que se trata dunha "actividade complexa e de risco potencial", o Parlamento insta á Xunta a eliminar a publicidade das apostas e o xogo na radio e televisión pública.