O escritor e xornalista británico Owen Jones, asegurou este luns na Coruña que "podería ser un perigo que Podemos non teña éxito" porque "os partidos populistas xenófobos de dereitas están aí esperando para encher ese baleiro".
O autor, un dos máis influentes da esquerda no Reino Unido, participou nun encontro electoral organizado por En Marea no Paraninfo da Universidade da Coruña no que cualificou estas eleccións xerais como "históricas".
"Creo que estas son unhas eleccións históricas non só para España senón tamén para toda Europa. A crise económica que empezou hai unha década fixo que unha élite dominante crease unha situación calamitosa, que tivo influencia en todo e fixo que o pagase a xente", apuntou.
Pensa que Podemos, xunto con "os seus aliados", loita "por un equilibrio das forzas que se atopan en Europa", que agora crean "un desequilibrio nas democracias e na sociedade", polo que espera o seu triunfo nos comicios.
"Podería ser un perigo o feito de non ter éxito porque os partidos populistas xenófobos de dereitas están aí esperando para encher ese baleiro. Afortunadamente non tiveron o éxito que esperaban en Francia. O que fan é dar unha esperanza fronte á austeridade tendo en conta de todo o pasado tráxico e escuro de Europa", engadiu.
Matiza Owen Jones "o que supón o éxito" para un partido que se fundou hai só un ano e medio" e que "rompeu o sistema de bipartidismo español", o que "é un éxito en si", pero se consegue "unha ducia de escanos no Parlamento sería algo insólito, algo así non sucedeu en ningún outro país de Europa" e sería "simbólico".
"Unha das claves do éxito de Podemos é o xeito de expor a comunicación"
Desde o seu punto de vista, "unha das claves do éxito de Podemos é o xeito de expor a comunicación" para que "a esquerda europea aprenda", porque non todo o mundo "pensa só en termos de esquerda ou dereita" senón que hai quen cre "que os temas hai que abordalos dun xeito convincente, un xeito coherente e un idioma que a xente poida comprender".
"Podemos é unha revolta dunha nova forma de comunicación que pode resoar na xente dun xeito diferente", argumentou o escritor, que cre que "unha comunicación coherente é máis efectiva que enarborar bandeiras como era a tradición antiga".
No resto do continente "a socialdemocracia na súa forma tradicional ha implosionado" porque aceptou "as regras do libre mercado, a austeridade e incluso as políticas que van en contra de quen os apoia" e "ten moi pouco que dicir", polo que "este baleiro está a ser enchido nalgúns lugares por movementos como Podemos", aínda que non ve que sexa un modelo que se poida "importar".
Compara a Podemos con Syriza e aclara que a Unión Europea "intentou dar unha lección" tanto ao país heleno como a todo o continente, non porque temese "o contaxio económico de Grecia, senón o contacto político".
"O que aprendín de Grecia é que había unha necesidade desesperada de solidariedade transfronteiriza que podía chegar á Unión Europea, que con frecuencia é un obstáculo. Estes cambios na UE necesitan producirse, sobre todo entre fronteiras", engadiu.
"Se non nos unimos os países máis aló das fronteiras, seremos derrotados"
"Un dos motivos -continúa- polos que estou a viaxar tanto é que se non nos unimos os países máis aló das fronteiras, seremos derrotados. Podemos ten esa vocación internacional", abundou.
Ve que neste contexto son as clases "media e traballadora" as que quedan de lado, pero "teñen os mesmos intereses" e deben defendelos, sostén, polo que necesitan "establecer coalicións que sirvan aos intereses de ambas as clases e non só aos dunha elite".
"Queren traballos dignos, seguros e cun salario decente, buscan boas pensións e bos servizos públicos como na educación ou a saúde. Unha vivenda digna, cun prezo alcanzable tanto para eles como para os seus fillos, e tanto políticos que non sexan corruptos como empresas que paguen os impostos", agregou.
Sobre a situación española cre que os profesionais da política "perderon a lexitimidade moral" porque "é unha elite que só serve aos seus propios intereses e benefíciase a si mesma", que "fixo pagar aos españois por unha crise coa que non tiñan ningunha relación".
"Suponse que un político é un funcionario que está aí para servir ás persoas que o elixiron, cando recorren ás portas giratorias o que fan é minar este suposto deber lexítimo. é unha ameaza para a democracia en España, en Gran Bretaña e en todo o continente", subliñou.
Non esqueceu o capítulo da corrupción, que "é moi diversa en canto á escala e os aspectos específicos en cada país" e fai especial fincapé no feito de que "hai casos que legalmente non son corrupción, pero si moralmente", que considera que deberían terminar.
