Os alcaldes e candidatos á alcaldía do Partido Socialista nos municipios da Fonsagrada, Baleira, Castroverde e Lugo reuníronse na mañá deste luns na capital lucense para expresar o seu apoio á declaración do Camiño Primitivo como Patrimonio da Humanidade fronte á Porta de Santiago da muralla.
Así mesmo, os catro candidatos, desde as súas "respectivas responsabilidades" solicitaron a posta en marcha de "campañas de divulgación e concienciación sobre a importancia do Camiño Primitivo" en todos eses municipios da provincia, como "fonte dunha cultura europea, hoxe cultura e patrimonio de todos", concretaron.
Tamén solicitaron expresamente a "colaboración da Xunta de Galicia para crear unha plataforma dos Camiños a Santiago", que sirva como "proxección turística da nosa Comunidade no mundo enteiro". Deste xeito, tamén propuxeron a creación dunha rede de cidades e comunidades autónomas do Camiño Primitivo, para fortalecer e potenciar os intercambios turísticos e culturais.
O manifesto foi asinado tanto polos alcaldes da Fonsagrada (Argelio Fernández Queipo), Castroverde (José María Fernández Arias) e Lugo (José López Orozco) como polo aspirante socialista en Baleira, Javier Núñez.