O concello coruñés de Oza-Cesuras acordou por unanimidade decretar o cesamento de actividade nas edificacións e instalacións que se dedicaban á celebración de vodas e banquetes na Rectoral de Cines por atoparse a menos de trinta metros dun cemiterio. Nun comunicado, a Asociación de Emprendedores de Galicia explicou que unha investigación da Xunta desvela que no antigo mosteiro levaba a cabo un uso hostaleiro en chan rústico e a poucos metros das tumbas.
A entidade advertiu de que esta decisión ten "carácter histórico" e reflicte "a situación de ilegalidade existente" en varios "pazos e instalacións similares ao longo da xeografía galega". O Goberno autonómico, a través da Axencia de Turismo, xa iniciara en outubro expedientes sancionadores a catro pazos da provincia da Coruña que celebran vodas e banquetes.
A Xunta de Galicia, a través da Axencia de Protección da Legalidade Urbanística, realizou unha investigación na que se constatou que que as obras realizadas no complexo carecían de licenza. En concreto, explican desde a asociación, constatou que no enclave se construíu un pavillón "para uso recreativo" duns 234 metros cadrados de superficie, ademais dunha piscina, pérgolas, construcións auxiliares para aseos, un corredor cuberto e unha carpa de recepción, entre outros elementos, que ocupan a maiores máis de 210 metros cadrados. "Todo iso sen solicitar a perceptiva licenza municipal e destinado a hostalería", di Ascega.
A entidade denuncia que alí se celebraban vodas e banquetes para preto de 200 comensais para as que non existían permisos
Ademais, e ante un intento posterior de legalizar "a ampliación do complexo", apunta a asociación, a arquitecta municipal emitiu un informe desfavorable e a Dirección Xeral de Patrimonio Cultural indicou que as obras provocaran "con certeza danos ao patrimonio arqueolóxico" e "resultan totalmente inadecuadas", sostén Ascega.
Tamén se comprobou que as celebracións de eventos, como vodas, facíanse nun radio de menos de trinta metros respecto dun cemiterio que está catalogado como zona verde, próximo á Igrexa de San Nicolás, tamén adscrita ao Catálogo do Patrimonio Cultural de Galicia.
A Axencia de Turismo xa iniciara o pasado mes de outubro expedientes sancionadores a catro pazos da provincia da Coruña
A actividade hostaleira na Rectoral de Cines, apuntan, levaba a cabo baixo unha autorización de establecemento de turismo rural con 21 prazas de aloxamento e un restaurante con capacidade para 35 persoas situado no edificio da Reitoral. "Pero a realidade mostraba que alí celebrábanse, desde hai anos, vodas e banquetes que albergaban a preto de 200 comensais nas carpas ou estruturas anexas para as que tanto a Xunta como o Concello confirmaron que non existían permisos", conclúen.
A situación da Rectoral de Cines enmárcase, asegurou Ascega, na "proliferación de situacións irregulares que pon en grave risco ás persoas que acoden a eventos en espazos que carecen dos permisos preceptivos". "No caso de que neles se producise calquera tipo de sinistro, as aseguradoras non teñen que responder e serían tanto os contratantes, neste caso os noivos, como o Concello quen terían que facer fronte de forma solidaria ou subsidiaria ás consecuencias de calquera eventualidade", agregou a mesma fonte.
