Un operario que traballaba no interior do recinto do complexo termal privado da Chavasqueira, en Ourense, para "pór ao día os filtros" foi a persoa que deu a voz de alarma das chamas que acabaron calcinando por completo toda a estrutura de madeira. O alcalde da cidade, Jesús Vázquez, desvelou este dato tras a súa visita este mércores ao edificio e, sobre as causas, pediu cautela, pois a Policía Científica estivo solicitando mostras e fotos, pero, como informou a Policía Nacional, falta dilucidar a orixe e ver se foi un accidente ou se trata dun feito "intencionado".
"Imos esperar", manifestou, e contou que puido constatar que as pozas, os "vasos", non están "tocados", pero si hai cascallo e restos de madeira sobre eles. "Día terrible", "unha desgraza", esgrimiu o rexedor do PP ante a prensa congregada na zona e agradeceu o traballo do corpo de Bombeiros, así como da Policía Nacional, o Local e de Protección Civil.
Durante horas, os bombeiros afanáronse en preservar a seguridade, pois coa choiva incrementábase o risco de derrube
Comentou así mesmo que convocou á xunta de portavoces á primeira hora e que recibiu a chamada de distintos conselleiros e do propio presidente da Xunta, Alberto Núñez Feijóo, para interesarse; "chamadas de apoio que se agradecen", remarcou. Tamén avanzou que se iniciaron os contactos coa concesionaria e coa Confederación Hidrográfica Miño-Sil para, entre todos, xunto aos técnicos do Concello, recuperar canto antes "unha icona", un emblema da cidade.
"Traballar, sumar", reivindicou Vázquez, e pediu non pór obstáculos.
Agora toca pensar en positivo, pornos todos a traballar e cooperar no ámbito loxístico, económico, e o que sexa necesario
Xunto a el, o presidente da Deputación Provincial, Manuel Baltar, que o contactou ás sete da mañá, trasladou a total dispoñibilidade do ente que preside para colaborar co obxectivo de volver pór en valor un emblema do sector termal da provincia. "Agora toca pensar en positivo, pornos todos a traballar e cooperar no ámbito loxístico, económico, e o que sexa necesario; pór todos os esforzos para que volva reabrir co mesmo esplendor que tiña e que siga sendo un dos símbolos termais da cidade e da provincia de Ourense", expresou.
E profundou en que impera a obrigación de colaborar automaticamente cando ocorren "sucesos como este e a contundencia da resposta e do apoio da Deputación de Ourense existe desde o minuto un". O presidente provincial animou no posible, con ánimo construtivo, ao alcalde e ao grupo de goberno, ao concello e aos ourensáns, "porque estamos nun momento no que nace unha nova oportunidade para o noso termalismo, traballando desde xa pola recuperación deste emblemático espazo".
O incendio que calcinou o complexo termal, no que non houbo que lamentar danos persoais pero si graves desfeitas materiais, desencadeouse de madrugada. Durante horas, efectivos do corpo de bombeiros afanáronse en preservar a seguridade, pois coa choiva se incrementaba o risco de derrube. á primeira hora da mañá deste mércores a zona permanecía acordoada e custodiada, precisamente por este risco de esborralle.
